戲份被搶 三哥 眼紅「鷲哥」吳岱融

小鮮肉睇得多都悶，家陣愈嗒愈有味嘅中佬至係王道！05年開始佔領不少無線型佬角色的 三哥 苗僑偉今年終於棋逢敵手，在新劇《飛虎極戰》遇上「鷲哥」吳岱融！邊個話爭風呷醋係女人專利，當中佬遇上中佬，原來仲有樣嘢叫做一山不能藏二虎，拍攝現場一個乾蒸、一個煲煙，就算擦肩而過一樣當透明零溝通，戲裡戲外都索到陣火藥味！

戲份被搶  三哥 眼紅吳岱融

16年由新加坡回流香港，同無線簽咗六年部頭約，57歲吳岱融憑《巨輪II》大反派「鷲哥」鹹魚翻生，人氣直逼「宇宙最型」、59歲苗僑偉。今年五月，邵氏兄弟同內地網站優酷合資巨製《飛虎極戰》拉攏二人29年後再度同場， 三哥 繼續做正氣警司，而鷲哥就有得演亦正亦邪大反派，睇牌面、論戲份同發揮， 三哥 似乎被比下去。

《學警》系列歷年中佬角色都係唯三哥獨尊，今年重頭劇《飛虎極戰》加入吳岱融，兩個同期出道50後型佬同場不過就完全無交流。

中佬同場 互不瞅睬

日前《飛虎極戰》劇組在將軍澳工業村拍攝一場車戰場面，同場就有分別飾演警司的苗僑偉、反派吳岱融及吳卓羲。明明在戲內與吳岱融至係父子，但現場所見，吳卓羲同鷲哥完全零交流，反而去到邊都陪住 三哥 。又唔怪得佢，05年至今，吳卓羲同 三哥 合拍五套劇，仲包攬《學警》三部曲男主角，在公在私都情同父子，「老竇」妒忌鷲哥又點會唔知？雖然兩個月前劇集記招時，鷲哥已經謙虛話明並非取代 三哥 型佬地位：「唔好咁講，冇話邊個取代邊個，大家唔同玩法！」

鷲哥戲份重 三哥無癮

但據知現實並非如此， 三哥 份人出名識做，不嬲喺片場同男女老幼都傾得兩嘴，所以今次拍《飛虎》同鷲哥冇交流真係好覺眼。其實以前幾套《學警》都係 三哥 作主，今次《飛虎》搵咗鷲哥返嚟唔止分薄曬啲戲份，聽講直情有高層話到明要寫多啲戲俾鷲哥。再講正派角色來來去去都係嗰啲，擺到明鷲哥個反派角色比 三哥 出好多，所以 三哥 真係拍到有啲無癮！

男人戲原來一樣分黨分派，早鷲哥十二年回流的三哥一早係無線最型中佬，一班後輩小生吳卓羲、黃宗澤亦都一早埋咗三哥堆。