滋潤夏日甜品 紅棗杞子圓肉鮮奶燉桃膠

呢排既天氣又熱又焗，真係會令人胃口大減。除左煲多啲清潤既湯水之後，其實都可以煲下湯水，都係一個幾唔錯既選擇呀。

小JM媽就整左一款既滋潤又養生既糖水，仲岩曬一家大細食添架。據說功效可以媲美貴價既燕窩、花膠，但價錢就極親民，所以又有「平民燕窩」之稱。你又知唔知係咩呢？就係 「桃膠」啦！

今次小JM就用桃膠整左 － 紅棗杞子圓肉鮮奶燉桃膠！

咩係桃膠呀？

桃膠顧名思義即是桃樹既產物！桃膠係由桃樹天然分泌出來既一種淺黃色透明既樹脂液

而當桃樹所流出既樹脂液當遇到空氣就會凝結成為硬身既晶體，就成為左我地食用既桃膠啦。

桃膠，可以話係近年興起既一種天然食材，因為價錢平功效佳，所以有「平民燕窩」之稱添。

桃膠既好處

原來桃膠除左坊間所講滋潤養生外，中醫師亦指出桃膠亦有助補充水份、潤燥，

而且對潤腸、通便甚有幫助。

桃膠適合大部分體質既人仕食用，一星期食一至兩次已經好夠架啦。

今次買左一大樽桃膠返來，可以得閒就慢慢整來食

想幾時食就預早一晚浸定就得。

桃膠點樣清洗浸發？

桃膠一般需要浸發大約十至十二小時，以令桃膠發大及變軟身。

因桃膠亦會含有雜質，所以必須經多次浸發、過水，及除去黏係表面既雜質即可。

因為桃膠經浸發之後會脹大，所以千萬唔好一次過發太多，以免造成浪費喔！

大約一至兩湯匙已經好夠架啦。

取出桃膠之後，就要將桃膠放於水中浸泡約十至十二小時。即係話隔一個晚上就okay啦！

第二朝就可以拎出來再清洗，將夾雜住係桃膠既雜質除去備用就可以了。

紅棗杞子圓肉鮮奶燉桃膠

材料：

桃膠 適量（要記得預先發好喔！）大紅棗 六粒杞子 適量圓肉 適量鮮奶 一盒

做法：

1.） 將 紅棗、杞子、圓肉洗淨，紅棗剪開除去核，備用

2.） 將鮮奶倒入大碗中

3.）將預先發好既桃膠加入至鮮奶中

4.） 取適量已洗淨切好既紅棗、杞子、圓肉加至碗中

5.）以錫紙包好湯碗，並將湯碗置放於水中燉20－30分鐘。

6.）完成後可按個人喜好加入冰糖，即可。

夏天天氣咁熱，唔想食熱既糖水亦可以將糖水雪凍先食，一樣都係咁美味。

因為小JM都有份食，所以媽媽我並無加冰糖。但因為紅棗、圓肉都帶甜，所以味道一樣唔錯喔！

製法簡單容易，大家都不妨一試呀！實行過一個健康有益又甜絲絲既Summer！

參考來源