專撬牆腳做狐狸精 做小三女星排行榜

近日人稱洗米華嘅澳門娛樂大亨周焯華，被指為咗享齊人之福， 豪送3億生活費畀Mandy Lieu，毫無斬纜之意。

Mandy Lieu出道多年形象一直好正面，但喺2014年佢發聲明承認同當時已婚嘅洗米華拍拖，即使被傳媒多次影到佢地偷情，依然唔肯放手。

佢更加完全唔以第三者身分為恥，同正印陳慧玲（Hedidi）喺社交媒體上互相駁火，令Heidi心死決定結束13年婚姻，不過洗米華就極力挽回，所以宜家只係分居狀態。

Mandy Lieu做第三者做到出曬面，即使被網民怒轟，依然堅持自我，仲為洗米華生咗兩個小朋友，留喺英國待產，勢要搶到做正印為止，認真麵皮厚～

龔嘉欣

一喊成名嘅龔嘉欣喺大台跑出，頻頻接戲。但原來外表清純嘅佢，其實係第三者慣犯，經常痴住已經有女朋友嘅男明星。

早前佢就被踢爆想介入楊明同莊思明嘅戀情，仲搞到莊思明喊到死死下，好彩楊明定力十足，成功氹返女友。冇幾耐之後，佢再被指搭上已經有女朋友嘅吳業坤。

出名偽毒嘅坤哥向來換畫換得快，當時佢同前港姐亞軍王卓淇密運中，但因為同龔嘉欣合作拍劇而經常接觸，龔嘉欣仲同坤哥共用暖包，摸手仔取暖，舉止親暱。

東窗事發後，王卓淇哽咽接受訪問，話祝福莊思明戀情唔好畀第三者夾擊，非常有骨，而龔嘉欣就話同坤哥好似兩姊弟咁互相照顧，真係講都冇人信！

楊愛瑾（Miki）

作為其中一塊餅碎嘅楊愛瑾Miki，自從組合解散後只係間唔中拍下戲，但就越住越豪，非常可疑。直至07年被傳媒影到佢同永安太子爺郭永淳密會，仲要被當時身患重病嘅正印大鬧，形象即時插水，同時解開第三者疑團。

踢走正印之後，二人公開戀情，冇幾耐就低調成婚，去年仲宣布有喜，真係快過打針。

消息傳出後，正印伍智恆接受訪問怒斥Miki係「狐狸精」、「通姦」，加上男方雖然身世顯赫，但有傳因為父母不滿Miki介入婚姻，所以決定低調結婚，免得招搖。

不過Miki就一直對外解釋拍拖嘅時候，對方已經搞緊離婚，堅稱自己冇做第三者。究竟誰是誰非，真係得佢地先知～

傅嘉莉

最近擔正主演劇集《乘勝追擊》嘅混血模特兒傅嘉莉，入行以嚟一直拒談感情事，但原來佢曾前後被踢爆搭上圈外嘅有婦之夫。

兩年幾前，佢被拍到同一個身形肥胖嘅中年叔叔行街，後來仲情不自禁喺的士錫錫，你以為佢地修成正果非常甜蜜？

但其實男方已經有老婆，仲喺密會完傅嘉莉嘅第二日同老婆手拖手行街，傅嘉莉第三者身分即時曝光，但佢就未有正面回應。

事隔一年，佢再攻陷另一名已婚城中富豪莊天龍，二人更被影到同遊米蘭，又攬又錫，再被揭發做人第三者。

後來佢轉移對象，另覓新富豪，而呢位新對象同樣已經有家室。

不過有傳因為傅嘉莉太痴身，被富豪男友嘅正印識穿，所以男方即刻斬纜。

回復單身嘅傅嘉莉屢戰屢敗，希望佢未來可以重新做人，唔好再破壞人地家庭幸福喇～

參考來源