原來 Pokemon Go係香港都一年...我發現到呢一刻仲玩緊既人先係最專一

唔經唔覺，Pokemon Go係香港都一年

GreatDaily

由第一日大家一安裝完個App就咁行街搵精靈，每一隻精靈都係新圖鑑，甚至好多玩家只係識比卡超、車釐龜，見到阿柏蛇會話「有條蛇呀！」，見到波音蝠就會話「好多蝙蝠呀！」。身為一個Pokemon嘅老粉絲，見到成街嘅人都從Pokemon得到樂趣，都對Pokemon加深認識，真係有一種不可言喻嘅感動。

到後嚟，好多人開始知道點樣先會遇到高CP嘅精靈，甚至喺年輕嘅玩家群入面，發展到好多人都知道每一隻精靈都有唔同既個體值（IV），仲有唔同強度嘅技能，大家都學識用一啲工具去追求完美。有人用一啲地圖更快咁去搵精靈儲糖，捕稀有精靈，又有人用一啲網站去查自己啲精靈嘅準確IV值，呢啲工具都幫到玩家好多。

由Pokevision被封起，官方開始封鎖一啲有違遊戲本意嘅第三方程式，包括地圖，同埋而家最具爭議性既Pokeiv，報料區亦變成抱怨區，好多文章甚至演變成罵戰，群入面嘅風氣差咗好多。

喺呢度我好希望每一位玩家可以花少少時間，睇下我嘅睇法。

日本三大動漫形象，分別係1969年嘅叮噹，1974年嘅Hello Kitty，同埋1996年面世嘅寵物小精靈。能夠成為一個有代表性既動漫形象，而唔係一個純粹商業化嘅卡通人物，Pokemon並唔單止係一個遊戲，對我嚟講更加似係一個世界，一個有血有肉嘅生態系統，當中嘅文化價值令佢成為世界最具影響力嘅遊戲之一。

每一個Pokemon系列嘅遊戲、漫畫或者動畫，都能夠將呢個生態系統入面一啲仲未比人發現嘅新嘢帶比每一位「探索者」。Pokemon遊戲一直都注重「佢可以帶咩比大家」多過「大家想得到啲咩」。

GreatDaily

呢度我想插一個題外話，目前宏觀手機遊戲市場，商業度高、容易賺大錢嘅課金型手遊，手法講到尾不外乎「讓玩家買爽」，何謂買爽？我付出咗大量金錢、時間或者心機，我就應該屌打你，我就應該係大哥。呢一類型嘅遊戲，會將玩家自然分類成唔同嘅階層，階層有高低，就能夠比人優越感，總之就係爽。而呢啲可能係好多人玩遊戲最想得到嘅野，因為無可否認，對於好多人嚟講，已經冇一個比喺一隻商業手遊上面課金更容易獲得成功感嘅方法。

但係Pokemon Go好明顯唔係一隻咁嘅遊戲，平時課金直接買爽度，嚟到Pokemon Go變左另一個世界。課咗金唔代表你屋企樓下會出現卡比獸，亦唔代表你條死魚進化就一定係一隻識Hydro Pump嘅鯉魚龍。就算付出大量時間、精神煲機，你亦未必能夠喺背背龍擱淺嘅時候行去嗰個地方。一切都係睇你好唔好彩，有冇天時地利，同埋考驗你有冇毅力去迎接無數次嘅「食白果」。而遊戲目前嘅PvP只有道館戰，就算你重課，那怕一棟五層嘅道館上面每隻都係CP值二千五以上嘅稀有精靈，喺敵隊圍毆之下，一樣站唔住腳。

Pokemon Go本身就唔係想玩家分高低。

好多玩家比一時嘅方便蒙蔽，曲解遊戲嘅本意，其實Pokemon Go本身就唔係想玩家分高低，要分高低嘅只係某部分人自己玩遊戲嘅本意。

見到好多人話「冇咗地圖點搵精靈」，甚至有人話「玩唔到落去」；好多人又話「冇得Check iv點知隻野勁唔勁」，甚至講到「咁不如唔好玩」。好多人都會話因為自己對遊戲有要求，但係冇諗過Pokemon Go從來冇要求過你需要一隻好強大嘅精靈先玩到落去，我地唔需要推副本，唔需要打降臨，只需要同三五知己一齊出街周圍行，嘻嘻哈哈，遇到稀有精靈固然係好，就算冇，同幾個朋友打下道館，散band果陣不仿屌下鬼「僕街做乜我地幾個去到邊都冇好嘢？」。Pokemon Go好玩從來都唔會係因為有得用地圖搵精靈，只會係因為Pokemon Go可以令大家聚埋一齊周圍去，重點唔應該係第三方地圖或者其他第三方軟體。

有人好荒謬咁話「冇左地圖，Pokemon Go等執粒，唔會有人玩」，其實令人好無言，小眾嘅情緒失控並冇代表性。每一種遊戲隨住時間都會有自然流失，尤其手機遊戲嘅情況係最明顯，原因主要係「免費」同埋「好多選擇」，唔適合自己就會走。會因為冇地圖而唔玩嘅玩家，只算係自然流失，因為Pokemon Go未必適合佢地。

另外，可能有啲人唔知道，Pokemon Go入面嘅個體值其實係Pokemon掌機原作遊戲個體值嘅簡化版，喺原作入面，玩開對戰會知道個體值完美度非常重要，好多時真係要計到盡，一點都唔少得，呢度我唔詳細講，遲啲有機會可以再討論。嚟到Pokemon Go，個體值由原作既六項減到三項，每項由雙位十六進制（最高31點），減到單位十六進制（最高15點），Pokemon Go傷害公式（以下設雙方都係40等，且爆擊不算在內）基本如下：

GreatDaily

（攻方精靈攻擊力／守方精靈防禦力ｘ技能傷害／2＋0.8）ｘ屬修ｘ相剋

ps1 0.8為40等時的最低傷害保證值

ps2 屬修為技能同屬修正，當技能屬性同自身屬性相同，會有1.25倍加成

ps3 相剋加成乘1.25，負修乘0.8

只講我嘅計算結果，以一隻滿等啟暴龍打一隻防禦滿個體嘅滿等卡比獸為例，如果普攻招式為Dragon Breath，攻擊個體值由零至十五打出嘅傷害係唔會有分別（最終輸出四捨五入），而絕招就算係用單回輸出最高嘅Hyper Beam，個體值零同十五嘅傷害都只係82同76嘅分別，最高同最低個體分別尚且唔大，即係大家如果都係用孵蛋出嘅精靈升上去（好似係最少70%IV，有錯請指出），實戰上根本就唔會存在個體差異直接導致輸贏嘅情況，即使將來會出現一打一嘅對戰亦都係一樣，策略配隊同對屬性相剋嘅認知遠遠比個體值重要。強調一點，以上所講嘅係四十等嘅情況，目前大家等級絕大部分都係三十等以下，個體值導致嘅差距就更細。

希望大家會明白我嘅意思，官方從來冇阻礙過任何人追求高戰力嘅精靈，即使日後大家都只能用計算器算出多個可能性，需要Power up進一步縮窄範圍，唔好覺得官方為難大家，遊戲本意從來都係希望大家感受努力過後先得到嘅快樂，又或者係學習面對努力過後原來得個吉，惟有再努力一次嘅精神。如果真係要玩得咁講究，又或者話咁執著於每一點數值，咁執著於對戰時候每一點嘅優勢，咁講求對戰過程嘅話，掌機版原作Pokemon先係呢一類型嘅遊戲。

最後，地圖又好，Pokeiv都好，有嘅時候我會用，甚至我會推薦叫朋友一齊用，但希望大家明白事理，呢一類明顯需要盜取官方唔想公開嘅遊戲資料嘅第三方軟體，官方有一日唔比大家用，只係因為呢啲軟體令Pokemon Go變成唔係佢想帶比我地嘅Pokemon Go。何況遊戲嘅所有野都係屬於官方，官方阻止第三方公司借Pokemon Go撈油水喺商業角度都係無可厚非，衰啲咁講「有得用係你賺咗，冇得用係合情合理」。我地有權唔鍾意玩，但係唔能夠打橫黎，對官方甚至係一啲支持官方做法嘅玩家惡言相向。

GreatDaily

無可否認嘅係，Niantic喺Server系統方面做得好差，遊戲多Bug，成日輕App，早前嘅垃圾右下角，系統唔完善成日Error既道館戰（唔知係咪因為多人打） ，外掛飛人橫行，好多好多影響遊戲體驗既缺憾，但係其實Pokemon Go仲發育緊，除左新嘅探測系統已經測試當中，官方亦已經開始打擊外掛（到底有冇錯封好人，就係另一個課題，但我行出街已經覺得少咗好多等級離地嘅可疑玩家，你覺得呢？），未來仲會有戰鬥同交易系統，同埋值得期待嘅第二世代，鍾意玩嘅朋友只好耐心等佢變好。

Pokemon Go係一隻輕鬆向手遊，呢個群亦係一班有心嘅玩家開出嚟比大家討論、分享嘅地方。發文又好，回帖又好，我希望大家都可以理性少少，退一步睇闊少少，其實大家無非都係同一個目的，希望玩得開心。

參考來源